प्रियंकाका पूर्व प्रेमी शाहिदले निक जोनसलाई दिए यस्तो सल्लाह

✍ बिप्लब पोख्रेल    2 years ago


प्रियंका चोपडा र शादिद कपुरको सम्बन्ध कुनै बेला बलिउडको ‘टक अफ द टाउन’ थियो । यी दुईबीचको कथित प्रेमसम्बन्धबारे भारतीय मिडियाले राम्रै कभरेज दिन्थ्यो । तर अब स्थिती फेरिएको छ । प्रियंका चोपडाले केही महिनाअघि मात्रै अमेरिकी गायक निक जोनसँग विवाह गरेकी छिन् भने शाहिद कपुरले पनि केही वर्षअघि मिरा राजपुतसँग विवाह गरेर एक छोरा र एक छोरी जन्माएर आफ्नो परिवार पूरा गरिसकेका छन् ।

तिनै शाहिद कपुरले प्रियंकाका श्रीमान् निक जोनसलाई सल्लाह दिएका छन् । उनले कार्यक्रम कफी विद करणमा निकलाई यस्तो सल्लाह दिएका हुन् । कार्यक्रममा उनी भाइ इशान खट्टरसँगै पुगेका थिए । कार्यक्रमको टिजर सोसल मिडियामा सार्वजनिक भइसकेको छ ।

करणले जब शाहिदलाई प्रियंका चोपडा र निक जोनसलाई कस्तो सल्लाह दिन चाहनुहुन्छ भन्ने प्रश्नमा उनले झट्पट उत्तर दिए, ‘म निकलाई यो भन्न चाहन्छु कि यो सम्बन्धबाट कहिले पनि बाहिर आउन नखोज्नु किनभने अहिले उनी जोसँग छन् उनी पूर्ण रुपमा ‘देसी गर्ल’ हुन् । यति भनेपछि शाहिदले क्यामरातर्फ आँखा झिम्काए ।

टिजर भिडियोमा शाहिद ईशानलाई जान्ह्वीको नाम लिएर जिस्काउँछन् । यस्तै, ईशानले पनि दाइलाई उनले जान्ह्वीको नम्बर कुन नाममा सेभ गरेका छन् भनेर देखाउँछन् । टिजरमा स्टार दाजुभाइको जोडी निकै मज्जाको देखिएको छ ।